القنطراوى مستغرب....!
شايف ان الموضوع بسيط مش محتاج خناق وزعيق
لما الموضوع يكون اصول يبقى العقل موجود
مستغرب من اللى يعوذ موظف ويقول عاوز كفاءه ويكون شاب اد الطحن ومتعلم وبيعرف فى التكنولوجيا يشتغل معايا , ولما يكون عضو مجلس شعب او غيرة موظف بياخد مرتب من فلوسنا يبقى عاوزه كبير فى السن ويكون خبرة !
وبخصوص الخبرة كثير من الناس شايفه ان ماسبق كان عك فاذا كانت هناك خبرة فهى فى العك الا من رحم ربى
مستغرب لما تمسك موظف عندك تحسبه على مواعيده وشغله وتطلع عينه وعند الموظف اللى ماتشفوش الا فى المناسبات او على الاقل ساعة الانتخابات تترجاه عشان يعمل شغله!
مستغرب من اللى عاوز يجيب نفس الناس فى نفس المكان وينتظر نتيجه تانيه !
مستغرب من اللى عارف ان فى مشكلة قبليه وان اللى بيوصل بيخدم قبيلته بس وعاوز يعيد الموضوع تانى ! ولما الحل بسيط ان يكون المرشح مش من اى قبيله , كده كل الناس هتدخدم بدل ما كان الناس مش طايله حاجه, وبكده كل القبايل تبقى متساويه مافيش قبيله تتميز عن قبيله بالسلطه.
مستغرب من اللى معاه فلوس وعاوز كرسى يخدم الناس به ! من باب اولى كنت خدمت الناس بفلوسك واللى مايعرفش يخدم الناس بفلوسه مش هيعرف يخدمهم بالكرسى ,اعرف شباب باقل امكانيات وعرفت تخدم ,وكمان الأنتراويه احرار ماحدش يشتريهم بالمال.
مستغرب من اللى متأكد ان ادارة الفترة السابقه كانت زفت وكان فى دم كتير ومع ذلك مش عاوزين يجربوا طرف جديد طرف يكون شباب مش محسوب على حد ,شباب سواء وصلوا او لأ هم اللى هيشتغلوا ويشيلوا البلد فخليهم يشتركوا فى تخطيط اللى هينفذوه.
مستغرب من الأب اللى عاوز ابنه يكون احسن منه ومع ذلك مش عاوز يديله فرصه ! هل هو مش واثق فيه؟ ولا مش واثق فى اللى رباه عليه ودفع دم قلبه فى التعليم عشان يوصله؟
مستغرب من اللى يقولك الجهل هيخسرك ! طب لما نفضل زى ماحنا هيزيد ولا ينقص ؟
مستغرب من شاب عارف كل حلولها ولا بيعمل ! ويعد يحلل ويقول لو عملوا كذا او كذا ولما تيجى الفرصه عشان يوصل صوته تعجبه القعده والشكوى
مستغرب من اللى مولود فيها واتربى فيها
وشاف طفولته واتعلم فى مدارسها ولما اتخرج اشتغل فيها وبنى اسرته وقرر يكمل
فيها ومع ذلك مش عارف انه اولى بيها
مستغرب من اللى فى عز شبابه بيقول صعبه ! هو فى ايه سهل فى الدنيا ؟ لو فضلت كده دلوقتى هتفضل طول عمرك زى ما انت
